2Cor 1 | GbrGAW | STEP | Wasika ye gmi n mi aba nu Bulus, oza kni-kniyi Shekwoyi nya, wa ze Yesu Kristi tnu-tnuyi, ɓedo n Timatawus yi eyi zado, kwoi lo a Yesu-viyi aba nɓa fi n Korinti nyi n Akaya yi vinya.

2 Corinthians 1

1 Wasika ye gmi n mi aba nu Bulus, oza kni-kniyi Shekwoyi nya, wa ze Yesu Kristi tnu-tnuyi, ɓedo n Timatawus yi eyi zado, kwoi lo a Yesu-viyi aba nɓa fi n Korinti nyi n Akaya yi vinya. 2 Shekwoyi eyi Dada n Yesu Kristi eyi Dagayi, wo tu zaho-zahoyi nfye anabarka, wa ga fye bugba fu njesun.

Shekwoyi Nu Bma Yi Zhin Lo

3 Yi zhin Shekwoyi godiya, owo nu n wo zhin eyi Dagayi Yesu Kristi Dada nyi. Ntu ge bmazhin vinya gmi nwo aba nu. 4 Owo nu bma yi zhin woi fu yi bugba dna eyi wahala vinya, nabai n yi ɓa mi ce, ya bma aza zhin nɓa fi lo n wahala gbo-gbo nyi. Esa n ya wuɓa wahala pya n ya sin, njesun ngye shi ya kun zhi nkwo, n Shekwoyi akala yi. 5 Shi yi sin wahala ngnisun n Yesu yi dna nwo a wahala nyi, elonu yi ɓa bwa owo bmazhin ɓedo n bugba fu yi. 6 Ndei ya sin wahala, yi sin ntu fye bmazhin ɓo nu, nfye gni-gniyi, ndei yi n bmazhin lo fyehin fye cei lo, nkwo nu ɓa bma fye zhin, fya bwa hankuli n wahala yi n yihin ɓo sin nyi. 7 Ntuce nu eyi awyetu n fye, kwo ta sha-sha m. Yi kpelo ge shi fye sin wahala lo ngnisun n yi nyi, fye zhin fya bwa eyi atnazhin hi pya lo ce. 8 Omi-azaje mi cei pma ma pa fye n wahalai ya sin dna Asiya nyi. Wahala ɓei la yi mwa ɓo sosai, har to yi kpe ge yi ɓa pwom. 9 Yi ɓei gye ge yi ku pma aza fi-fiyi ze nu. Ama deye ɓei zhin ntuge to ya kpema eyihin tukwom, ama n Shekwoyi, n wo ku azafi kala nyi. 10 Dna efi wahala yi pya wa gni yi woi ɓo gniyi nabye. Yi na wyetu yi lo nge wo ɓa gyi abye wa gni yi. 11 Shi fye bma yi zhin n aduwa yi nyi. Har kwa ze ge aduwa nfye zhin laɓa ntu yi ɓo nyi, ɓa gyi nasara, Shekwoyi wa tuyi anabarka, har aza mwa kwa ɓa zhin wo godiya.

12 Eyi bugba bui-bui nyi, har eyi ɓemwi-i wu yi ge, eyi zan-zan dna nna anyi ye, tun ba ga eyi aɓozhinzhin nfyei, ɓa ku ze n Gyi-gyi-yi, n gaiciya yi, n Shekwoyi aba. Ya zhin lo nu, to ge dna n anyi ɓeyekpe nu m, ama alheri Shekwoyi nya nu. 13 Yi ka fye enya nu nfye ɓa ba fye bwa awyega njesun. Omi wyetu nu nge fya bwa kwo awyega vinya. 14 Nya fye kpeye n saiye nyi ko to nu-nuyi lo m. Ama, Esa Yesu ɓei ɓe n cei, fye ɓei kpe ɓeho-ɓehoyi ye vinya, fye ɓei gyigbe n yi-i ngye shi yihin ɓei gyigbe n fyei. 15 Mi ɓei kpe deye tunyi sapa, cenu na zhin ma ye ntuge, ma je fya ba ɓe, n nabai fye bwa anabarka zunɓa. 16 Gama mi ɓei ce pma ma ɓe fya ba, esa n mi ɓei lo Makidoniya nyi, njesun esa yi nma jeze ɓe, n nabai ma bwa bmazhin nfye har n kwo ba lo mi-i n Yahudiyaʼkni.

Knihin Nu Be Nkalalai Ya?

17 Ama esa mi zhin shiri deye pya ma, mi zhin ma vi omi ɓeye nu? Mi zhin ma mwi anya dai-dai? Har ma cige, E, ma jeci ge aʼa nsa gmanyi? 18 Shekwoyi kpelo ge mi to ɓo zhin fye alkawali, Eh nya nu ɓedo n aʼa yi m.

19 Ntuge Yesu Kristi Shekwoyi nugun n Sila ɓei zhin fye waʼazi n wo tukwo nyi. Har Timatawus ɓedo nmi yi ya kuje fye gna nyi, wo to zhin oza nu nwo ci ge, Eh, woi je ci ge aʼa m. Ama wo zhin wa ci ge Eh nu, deye kwa, ko gmi n Shekwoyi aba nu. 20 Gama owo nu zhin wa nu Shekwoyi alkawali vinya, cenu zhin yi ci ge, Amin dna Yesu, yi ci lonu dna Shekwoyi mwa-mwa nu. 21 Shekwoyi nu mi yi awye-wyeyi zhi, ɓedo n fye nya yi dna Yesu. Shekwoyi nu la yi kni zhi. 22 Woi la yi tu ze nge yi zhin owo nya nu. Woi la Zafun Gyi-gyi-yi gayi kwa wu ge lalle wo ɓa zhin nyaho ntu yi ɓo na bye.

23 Shekwoyi nu zhin omi saida da. Wo kpemi bugba lo, mi ɓei ye ntuge fya pwo nu, cenu ɓei zhin to ma ye ma ɓe Korinti m. 24 Yi ta tu fye dole nu ge fye vi nya yi da nyi m, gama fye gni-agni lo so-sai dna gaiciya, yi zhin tnu-tnu nfyei ntuge fya dagma.